Emigrantët shqiptarë dërguan 53 milionë euro më pak gjatë vitit 2009 në shtëpitë e tyre krahasuar me vitin 2008. Të dhënat më të fundit të Bankës së Shqipërisë në lidhje me zhvillimet ekonomike të vendit përgjatë vitit të shkuar raportojnë për një rrudhje të ndjeshme të dërgesave të emigrantëve krahasuar me një vit më parë.
Në total përgjatë 12 muajve të vitit të shkuar emigrantët shqiptarë injektuan në ekonominë e vendit rreth 780 milionë euro ndërkohë që gjatë vitit 2008 kjo shifër vërtitej në 833 milionë euro. Kriza që ka prekur ekonomitë më të mëdha botërore dhe sidomos vendet ku kanë emigruar shqiptarët si Italia dhe Greqia, e pasqyruar me humbjen e vendeve të punës shihen si një nga shkaktarët kryesorë të këtij treguesi. Ndërkaq, krahas krizës, uljen e nivelit të dërgesave të emigrantëve ekspertë të ndryshëm e lidhin edhe me një zhvillim tjetër që ka të bëjë me stabilizimin social të tyre në vendet ku kanë emigruar. Referuar këtyre vlerësimeve, pasi ka kaluar më shumë se një dekadë emigracion çdo vend përballet me ulje të nivelit të dërgesave për shkak se emigrantët fillojnë të stabilizohen në vendet ku kanë shkuar dhe fillojnë të investojnë aty.
Krahas uljes së dërgesave nga emigrantët, Banka e Shqipërisë thekson edhe uljen e nivelit të kreditimit të ekonomisë gjatë vitit 2009 nisur nga një serë faktorësh, si problemet e biznesit të shlyerjen e interesave, shtrëngimi i kushteve prej bankave si dhe luhatjeve në kursin e këmbimit. Lidhur më këtë BSH raporton për një rritje të kredive me probleme, të cilat gjatë 2009 arritën në nivelin e 10.5 për qindve. Për shkak të uljes së ritmeve të kreditimi si dhe nevoja për rritjen e fondeve rezerve për përballimin e rrezikut të kredive të këqia bankat kanë nxjerrë një fitim neto sa gjysma e atij të vitit 2008. BSH raporton për një fitim në nivelet e 3.5 miliardëve të sistemit bankar shqiptare gjatë vitit të shkuar. “Raporti i kredive me probleme ndaj vlerës së përgjithshme të portofolit të kredisë u ngjit në nivelin 10.5 për qind. Nevoja për rritjen e fondeve rezervë për përballimin e rrezikut të kreditit nga ana e bankave, ndikoi në rënien e rezultatit financiar të sektorit. Për këto arsye, gjatë vitit 2009, rezultati financiar i sektorit bankar ishte pozitiv për rreth 3.5 miliardë lekë, gati gjysma e vlerës së realizuar një vit më parë”, – citon BSH.
Përballë një kursi këmbimi të luhatshëm i cili ndikon drejtpërdrejt në rritjen e kredive të këqia Banka e Shqipërisë iu sugjeron bankave të nivelit të dytë si dhe qytetarëve që në vend të kredive në valutë të zgjedhin atë në lekë. “Zgjidhja më e mirë do të ofrohej nga zbatimi i politikave më të ekuilibruara të kreditimit të cilat synojnë rritjen e peshës së kredisë në lekë”, – vijon BSH.
Bilancin vjetor të ekonomisë shqiptare BSH e mbyll me një parashikim pozitiv për zhvillimet e këtij viti duke theksuar domosdoshmërinë e vigjilencës së autoriteteve shtetërore.
