Paraprakisht, bëj të ditur që ky imi është një opinion krejt spontan, aspak tendencioz dhe nuk kam asgjë personale ndaj artistes Ornela Vorpsi.
Por, më lind natyrshëm pyetja:
Sa e ka të nevojshme një femër që, për të pasur vëmendje në maksimum – pavarësisht se ajo, një femër profesioniste e kompletuar – të dalë në media, më tepër sesa duke folur për karrierrën e saj të suksesshme në mënyrë të mirëfilltë, duke përmendur një burrë të njohur gjatë jetës së saj (cliché: ky i fundit, rreptësisht figurë publike) e të bëhet objekt bisede e komentesh në mënyrë intensive?
Sepse, normale. Nuk po përmend për mirë apo për keq një njeri çfarëdo por, një personazh publik.
Ndaj reagimet e opinionit publik janë diçka e mirëqenë, priten. Fundja janë edhe qëllimi yt, ti në një farë mënyrë i stimulon vetë ato.
Përdorin të dyja këto femra, një emër mashkulli, të njohur, figurë publike, që ka lënë shenjë në jetët e tyre:
në mënyra strategjike të ndryshme, njëra – Ornela Vorpsi – që e lartëson Ramën, e komplimenton, shpreh adhurim për të e tjetra, – Asia Argento – që e akuzon Weinstein-in për violencë pas 20 e ca vjetësh e hap fushatën e skandalit hollywood-ian.
Më thoni ç’të doni por, mua më vjen natyrshëm një paralelizëm i tillë, ndonëse ai përmban karakteristikat e veta përkatëse.
Që jua shpjegoj më poshtë për faktin e thjeshtë se, pse një femër – ndër të tjera e suksesshme – shqiptare apo e huaj, është e kotë që, pasi ka përmendur publikisht një emër mashkullor publik të një farë reputacioni të rëndësishëm, duhet që të japë intervista të tjera e të dalë në media duke shtuar argumentimet e veta mbi fokalizimin e saj mbi atë person, të bëjë edhe viktimën sipas rastit se po e “keqkuptojnë”, të ketë nevojë për solidaritet, sidomos femëror etj.
A nuk është patetizëm i mirëfilltë ky apo një lojë strategjike?
Pse një artiste nga diaspora, kur shkon në Shqipëri për të paraqitur një ekspozitë, për të promovuar një libër apo për t’i bërë të njohur publikut shqiptar çfarëdo veprimtarie të vetën profesionale, në një intervistë apo tjetrën ku ftohet, duhet me doemos që të përmendë një detaj të jetës së vet – përveç detajesh personale autobiografike të familjes – lidhur me një emër të njohur të panoramës shqiptare, qoftë kjo politike, kulturore apo sociale?
Ornela Vorpsi: një artiste e realizuar mesa duket. Gëzohemi për të si për çdo shqiptar/e që korr sukses sidomos nëpër botë.
Por, unë them:
Nën petkun e një komunikimi të hapur e natyrisht “pa komplekse”, ku një ‘vip’ mund të rrëfehet haptas me publikun për çdo gjë nga jeta e vet, shpalosja e kësaj dashurie, qoftë platonike në rastin konkret të saj me Edi Ramën, a ishte e nevojshme që të trumpetohej në këtë mënyrë, në momentet e ardhjes së saj në Shqipëri?
Pse pati nevojë për emrin e Ramës kjo artiste, qoftë edhe se e bën për komplimente për të?
Mirë që s’paska pasur ndonjë peng negativisht me Ramën fundja se, në të kundërt do të më dukej krejt, në mënyrë analoge si “Asia Argento shqiptare”, që do të hapte çështjen e “X” skandali në Tiranë, si ai hollywoodian i artistes italiane me Weinstein-in…
