Ata që e shitën kombin, e hoqën flamurin
Shënim nga Redaksia. Publikojmë reagimin e Lëvizjes Vetëvendosje në lidhje me heqjen e flamurit kombëtar shqiptar me rastin e vizitës së Sekretares Amerikane të Shtetit, Hillary Clinton.
Dje nëpër kryeqytet u hoq flamuri ynë kombëtar i vendosur paraprakisht për hir të vizitës së Sekretares Amerikane të Shtetit, Hillary Clinton. Kompania e cila e vendosi në çdo vend nga një flamur kombëtar mes dhjetëra flamujve të shtetit të Kosovës dhe ShBA-ve, po kjo kompani i hoqi flamujt kombëtarë. U mor vesh se kështu urdhëroi ambasada amerikane në Kosovë. Lëvizja VETËVENDOSJE! e dënon aktin qyqar të heqjes së flamurit kombëtar shqiptar dhe servilizmin e panevojshëm e politikanëve qyqarë. Ata të cilët nuk e mbrojnë kombin e vet, ashtu qysh e mbrojnë atë edhe ShBA-të, nuk mund ta ndërtojnë as shtetin. Këta njerëz që tallen me flamurin tonë kombëtar janë ata që moti e kanë shitur kombin. Njeriu që e shet kombin, nuk ka dinjitet njerëzor dhe as mund të jetë përfaqësues i interesave të kombit dhe interesave të popullit.
ShBA-të kurrë nuk mund të kenë respekt për njerëz të nënshtruar. Vetë ShBA-të për flamur kombëtar e kanë atë me të cilën u çliruan nga Britania e Madhe. Flamuri me të cilin Kosova u çlirua nga Serbia është flamuri ynë kombëtar. Flamuri ynë nuk ka pse t’i pengojë askujt.Prishtinë, 12 tetor 2010Lëvizja VETËVENDOSJE!
