Ditën e shtunë 12 prill, në hapësirën e mjedisit të Teatrit të Operas e Baletit, Tiranë, u zhvillua ceremonia e promovimit të librit “Pasioni i biznesit”, botim i parë në llojin e tij nga ana e Qendrës së Medias Ekonomike dhe Sociale, në bashkëpunim me Agjensinë Telegrafike Shqiptare, që trajton analizën e profileve profesionale të 57 grave shqiptare të suksesshme dhe protagoniste si sipërmarrëse, veçanërisht në Shqipëri, Kosovë, Maqedoni e Evropë.
Ne ceremoninë e promovimit të librit, realizuar prej autores dhe organizatores së eventit, znj. Nini Mano, gazetare e ekonomisë, ishin të pranishëm edhe bashkëpunëtore të realizimit të veprës, miq, dashamirës e përkrahës të nismave të tilla, kryesisht të realizuara nga ana e grave shqiptare, disa nga protagonistet dhe autoritete të ndryshëm.
Ky libër, me autore znj. Nini Mano, që sheh si bashkëautore disa gazetare shqiptare të fushës së ekonomisë dhe si protagoniste, gra shqiptare të trevave të ndryshme, të cilat kanë filluar veprimtarinë e tyre në biznes, menjëherë kryesisht pas viteve ’90, sipas mundësive, konteksteve, sipas përgatitjes vetjake e rrethanave të ndryshme, për të arritur secila në një hark relativ kohor, rezultate të rëndësishëm në këtë lëm, është e para vepër që tenton t’i bëjë të njohur publikut shqiptar e atij të huaj, profilet e grave shqiptare aktive e të suksesshme sidomos në biznesin e mesëm e të madh të çfarëdolloj fushe, aspekt ky, që deri tani, ndoshta ka qenë edhe jo mjaft i njohur për opinionin publik.
“Ndjehem mirë që me disa kolege të mijat, ja dolëm për të bërë të njohur tek publiku forcë, guxim, këmbëngulje dhe aq shumë dashuri, të këtyre grave të jashtëzakonshme, që kanë sfiduar gjithçka me punë dhe sakrifica aq të mëdha! Por aq pak të njohura sa duhet në mjedisin tonë shoqëror! Pas të parit, QMES do të vijojë me botime të tjera për promovimin e sipërmarrëseve në biznes, sipas fushave dhe kudo ku ka gra shqiptare!” – u shpreh autorja Nini Mano
Për të mos humbur artikujt publikuar nga Albania News na ndiqni në Google News
Diskutime mbi këtë artikull