Elisabeth Burgos, sociologe dhe antropologe me origjinë nga Venezuela, në tregimin e saj të gjatë: “Quhem Rigoberta Menchù”, lidhur me gjendjen e gruas në Guatemala, ndër të tjera citon: “Kur diskutohet për çështje problematike femërore, është e dobishme që edhe burrat të jenë të pranishëm dhe të japin kontributin e tyre. Përse na duhet të edukojmë gruan, nëse burri nuk është i pranishëm, nuk merr pjesë edhe ai vetë në këtë rrugëtim formimi, nuk mëson edhe ai vetë?”
Tedx Tirana Women është një event një ditor, i cili organizohet paralelisht me homologët e tij në San Francisco, SHBA dhe ato në 230 vende të tjerë të botës, të organizuar të gjithë paralelisht, brenda së njëjtës ditë.
Faktikisht, në San Francisco organizohet për tre ditë rresht, më datë 4, 5, 6 dhjetor, ku takimi i tyre i fundit përputhet me atë të Shqipërisë, të datës 6 dhjetor.
Në USA, ky event i drejtuar e dedikuar veçanërisht grave, është realizuar për herë të parë në 2010.
Në Shqipëri, takimi i parë i konferencës së TEDx, me pjesëmarrje të figurës mashkullore, është realizuar në prill 2013.
Kësaj rradhe, në Tiranë, Tedx Tirana Women do të zhvillohet më datë 6 dhjetor 2013 në Chateau Linza.
Siç pohojnë organizatoret e konferencës, në lidhje me gratë shqiptare, nuk qe edhe aq i lehtë organizimi dhe përfshirja e tyre në këtë event, gjithsesi, figurat femërore të përzgjedhura tashmë për eventin, janë gra të forta, inteligjente dhe të pajisura me dëshirën për të ndarë me publikun përvojat e tyre.
Është një mundësi për të sjellë në podium – por jo për të bërë një paraqitje skenike apo thjesht ligjëruese, ndërkohë që do të komunikojnë drejtpërdrejt me pyetje e përgjigje me publikun – gra shqiptare, të cilat kohët e fundit, janë shquar me karakteristikat e tyre të veçanta, secila në fushën e vet, si mbartëse të ideve pozitive, përparimtare, krijuese, ndërtuese, nismëtare të çdo sektori, në shoqërinë shqiptare.
Pjesëmarrëset folëse do të jenë 6 figura femërore të nderuara shqiptare, të përzgjedhura sipas një kriteri të rreptë, i cili ka mbajtur parasysh sygjerimet nga ana e publikut nëpërmjet një forumi të hapur pak kohë më parë në sitin e Tedx Tirana Women e në faqen zyrtare në platformën facebook, por edhe nga kërkime e thellime të detajuar të organizatoreve të eventit.
Publiku do të jetë i përbërë nga figura të njohura të shoqërisë shqiptare – jo detyrimisht vetëm gra, por edhe burra – një pjese të ketij publiku i është mundësuar pjesëmarrja nëpërmjet ftesash, pjesa tjetër ka blerë biletat, këto ditë në shitje në Tiranë.
Duke qenë se formulimi i formatit të eventit ka si synim një përfshirje të trajtimit të figurës femërore nën aspektin e kultivimit të fuqisë së saj prej mendjes, trupit e shpirtit, – ku në këto dy elementet e fundit, mendohet se veçanërisht, yoga ka ndikim të pamohueshëm pozitiv – përpara fillimit të veprimtarisë, pjesëmarrëset do të përfshihen në një seancë yoga, për të mbërritur në event, të qeta e krejtësisht të shplodhura, pa tensione, të përqendruara në ato çka eventi do të trajtojë mbi figurën femërore dhe rolin e saj në shoqëri.
Eventin do ta moderojë Besa Shahini, një analiste e njohur nga Kosova, e cila shquhet – përveç përgatitjes së saj të dallueshme – si një grua me një aftësi të lartë komunikuese e që do të garantojë një gërshetim të realizuar e të arrirë, ndërmjet diskutimit të folëseve të përzgjedhura dhe ndërhyrjeve nga ana e publikut për bashkëbisedim të drejtpërdrejtë e shkëmbim mendimesh me protagonistet e mbrëmjes.
Gjashtë figurat femërore pjesëmarrëse, të përzgjedhura për të folur drejtpërdrejt nga podiumi për të paraqitur përvojat e tyre, profesionale apo edhe tërësisht vetjake, për të shprehur – si në rastin e ndonjërës prej tyre, publikisht tashmë e njohur – ndonjë kuriozitet, që në hapësira të tjera informative të mëparshme, nuk kanë pasur mundësi të rrëfejnë, janë:
– Milena Harito, e cila do të ligjërojë jo si politikane, por si një grua e arrirë, që vjen që nga jashtë Shqipërisë, për të dhënë kontributin e saj e për të vënë në shërbim të shoqërisë shqiptare, fuqinë e saj intelektuale, fuqi e cila nuk do të arrinte efektin e saj të plotë, nëse njëkohësisht, nuk do të ishte e kurorëzuar me thjeshtësinë.
– Elhaida Dani, këngëtarja e re shqiptare, e cila triumfoi në talent – show “The Voice of Italy 2013” e që shquhet njëkohësisht për komunikimin e saj të sjellshëm, të dashur e të çiltër me publikun – si shqiptar, italian apo ndërkombëtar – e që do të tregojë mbi rrugëtimin e saj artistik. Elhaida edhe do të interpretojë gjithashtu ‘live’ për publikun.
– Suela Lala, një aktiviste e njohur në shoqërinë shqiptare, në mbrojtjen e të drejtave të personave me aftësi të kufizuara, për të ndarë me publikun përvojën e saj.
– Ilva Tare, një gazetare e mirënjohur në ekranin shqiptar, me rrëfimet e saj vetjake e profesionale të reja e befasuese.
– Emanuela Pepkola Zaimi, themeluesja e fondacionit Down Syndrome Albania, e cila me rrëfimin e përvojës së saj personale, do t’i bëjë të njohur opinionit publik, këmbënguljen dhe përpjekjet e saj – deri tani, shumë të suksesshme – në lidhje me krijimin dhe përforcimin e veprimtarisë së këtij fondacioni, me objektiv përmirësimin e kushteve të jetës dhe integrimit në shoqërinë shqiptare, të fëmijëve dhe personave me sindromën Down.
– Anila Sulstarova, një psikologe e njohur shqiptare, e cila do të përqendrojë fjalën e saj në ndërthurjen e veprimtarisë profesionale dhe të asaj familjare të gruas.
Një tjetër figurë femërore, pjesëmarrëse në event, do të jetë edhe stilistja e modës nga Kosova, Drenusha Xharra, e cila nëpërmjet një bashkëbisedimi të shkurtër, të ndërthurur me një sfilatë mode me modelet kosovare, do t’i japë eventit një formë të këndshme shfaqjeje e do të ketë mundësi të shpalosë aftësinë e saj krijuese.
Realizimi i eventit është mbështetur në punën e gjashtë organizatoreve dhe një numri të konsiderueshëm vullnetaresh, të përkushtuara në kurimin e çdo detaji dhe në arritjen e përkryer të mbrëmjes.
Mundësia e një transmetimi televiziv të drejtpërdrejtë nuk qëndron, edhe për faktin se do të bëhet një ndërthurje e paralelizëm dhe me transmetimin nga USA, por natyrisht, vetëm pas pak ditësh, në sitin zyrtar të Tedx e në faqen zyrtare facebook, do të jepen të gjitha komunikimet e duhura për mundësinë e shikimit dhe ndjekjes së eventit. Pa dyshim, do të vijojë ngarkimi në kanalin përkatës të eventit në Youtube.
