Shpërthimi i qerres: Një traditë fiorentine

Çdo vit, në Firence e diela e Pashkëve festohet në një mënyrë shumë të veçantë. Shpërthimi i qerres (Lo Scoppio del Carro) është një traditë që e ka zanafillën e saj rreth 350 vjet më parë.

Qerrja e dekoruar, që njihet edhe me emrin “Brindellone“, është ndërtuar për herë të parë në vitin 1622.

Në formë kulle me 2-3 kate, ajo tërhiqet, nga dy qe të zbukuruar me kurora, nëpër rrugët e Firences, deri te Piazza del Duomo në hapësirën që gjendet ndërmjet Pagëzimores (Battistero) dhe Katedrales.

Pjesërisht historike e pjesërisht fetare

Kjo traditë i ka rrënjët e saj në disa ngjarje që kanë një natyrë pjesërisht historike e pjesërisht fetare.

Sipas historisë tregohet për një djalë të ri fiorentin me emrin Pazzino, një anëtar i familjes fisnike Pazzi, i cili në Kryqëzatën e Parë të Luftës së Shenjtë të vitit 1099, tregoi një guxim të madh (ai qe i pari që u ngjit në muret e Jerusalemit dhe ngriti flamurin e krishterë) aq sa mori si dhuratë 3 gurë stralli me prejardhje nga Varri i Shenjtë. Gurët që Pazzino solli me vete në fund të kryqëzatës, përfaqësojnë një thesar shumë të rëndësishëm fetar për Firencen, dhe ruhen te kisha Chiesa di SS. Apostoli .

Ceremonia që mund të shohim sot nuk është aq e ndryshme nga ajo e së kaluarës, meqë na propozon të njëjtin ritual. Gjithçka fillon rreth orës 10 të mëngjesit, një prift i fërkon me njëri-tjetrin tre gurët e strallit të Pazzino-së shkëndijat e të cilëve ndezin qiriun e Pashkëve; ky qiri pastaj përdoret për të ndezur thëngjijtë që gjenden në një enë në Qerre.

Procesioni pasi përshkon rrugët e Firences ia dorëzon Zjarrin e Shenjtë Kryepeshkopit përpara kishës Santa Maria del Fiore , që njihet nga të gjithë me emrin Duomo. Qerrja shoqërohet përgjatë rrugës nga një procesion me lodërtarë dhe flamurtarë, të gjithë të veshur me veshje tradicionale historike, madje edhe zyrtarët e qytetit e përfaqësuesit e klerit vishen me rroba tradicionale.

E furnizuar mirë me Fishekzjarre

Qerrja “Brindellone”, e furnizuar mirë me fishekzjarre, kur arrin para katedrales, ndalet dhe pret fillimin e meshës. Pak a shumë rreth orës 11 nga altari i Katedrales, ndërsa brenda kishës këndohet Gloria, Kryepeshkopi ndez me anën e zjarrit të shenjtë një raketë në formë pëllumbi (që quhet “La Colombina”, e që simbolizon Shpirtin e Shenjtë), kjo nga ana e saj fluturon jashtë kishës përgjatë një teli dhe përfundon duke goditur Qerren në mes të pjacës, duke shkaktuar ndezjen spektakolare të fishekzjarreve që përshëndetet me duartrokitjet e të gjithë publikut: kjo është ajo që ne në Firence e quajmë Shpërthimi i Qerres (Scoppio del Carro)!

Në qoftë se rituali zhvillohet rregullisht dhe të gjitha fishekzjarret shpërthejnë, atëherë parashikohen të korra (vjelje) të mira e me bollëk e fat i mirë për qytetin e për të gjithë qytetarët. Për këtë arsye, çdo vit, të gjithë shpresojnë në një Shpërthim të Qerres pa probleme…