Në datën 12 dhjetor 2011, me praninë e Ambasadorit Llesh Kola, u zhvillua në qytetin e Ankonës ceremonia për përurimin dhe fillimin e veprimtarisë së Konsullatës së Nderit të Republikës së Shqipërisë në Rajonin e Markeve, me kryeqendër Ankonën. Ishin të ftuar dhe merrnin pjesë me këtë rast, Arqipeshku i qytetit të Ankonës, Imzot Edoardo Menichelli, Presidenti i Rajonit të Markeve Gian Mario Spacca, Admirali Giovanni Pettorino, Presidenti i Autoritetit të Portit të Ankonës Luciano Canepa, Sekretari i Përhershëm i Nismës Adriatiko-Joniane, Ambasadori Fabio Pigliapoco, përfaqësues së Bashkisë së Ankonës, të komunitetit shqiptar në Ankona dhe të ftuar të tjerë.
Në fjalën e tij përshëndetëse, Ambasadori Kola shprehu kënaqësinë për hapjen e Konsullatës së Nderit. “Ajo do të jetë një zyrë e re shërbimesh për marrëdhëniet italo-shqiptare dhe për qytetarët shqiptarë” – tha ai dhe bëri vlerësimin për emërimin e z.
Matteo Rossi në postin e Konsullit të Nderit. Rajoni i Markeve – vijoi ai – me të cilin Shqipërinë e bashkon deti Adriatik, është një rajon me rëndësi të veçantë për Shqipërinë.
Marrëdhëniet me këtë rajon janë historike dhe tradicionale, por aktualisht ata janë intensifikuar edhe në kuadër të bashkëpunimit rajonal shumëpalësh, nën ombrellën e projekteve të Komisionit Evropian, të Eurorajonit dhe të Nismës Adriatiko-Joniane. Në Rajonin e Markeve – nënvizoi Ambasadori Kola – jetojnë më shumë se 22 mijë qytetarë shqiptarë, prej të cilëve më shumë se 5 mijë jetojnë në qytetin e Ankonës. Kjo përbën një nga arsyet pse kemi zgjedhur qytetin e Ankonës për të hapur një Konsullatë Nderi – tha ai, duke vijuar se “kjo ishte e domosdoshme po të kemi parasysh se porti i Ankonës është i lidhur ngushtë me Shqipërinë për transportin e njerëzve dhe të mallrave jo vetëm për shqiptarët nga Shqipëria por edhe nga Kosova, aeroporti i qytetit është gjithashtu një pikë lidhjeje me këtë Rajon por edhe pikë kalimi.
Në këtë kontekst, funksioni i Konsullatës së Nderit do të jetë i dyfishtë: së pari do të jetë një pikë referimi për Shqipërinë dhe institucionet rajonale dhe lokale italiane; së dyti, ajo do të shërbejë si një pikë referimi për të gjithë qytetarët shqiptarë. Më tej, Ambasadori Kola, në fjalën e tij, theksoi marrëdhëniet e shkëlqyera që aktualisht ekzistojnë ndërmjet Shqipërisë dhe Italisë, dhe bashkëpunimit të ngushtë dhe të frytshëm në të gjitha fushat.
Z.
Rossi, në fjalën e tij, shprehu falenderimet për autoritetet shqiptare për emërimin dhe besueshmësinë e dhënë për postin e Konsullit të Nderit të RSH-së në Ankona. “Është një post që më bën të ndjehem i nderuar por në të njejtën kohë mbart përgjegjësi të cilat do të angazhohem t’i përmbush në mënyrën dhe formën e duhur” – nënvizoi z.
Rossi. Më tej, ai vijoi me një prezantim të lidhjeve tradicionale të familjes së tij me Shqipërinë, duke përmendur me shumë kënaqësi nismat e babait të tij, ish-Drejtor spitali dhe mjek i njohur për të kuruar qytetarë shqiptarë, si edhe lidhjet e ngushta dhe bashkëpunimin që ka me Shqipërinë familja e tij. Ai përmendi gjithashtu përvojën shumë pozitive gjatë vizitave të ndryshme që ka bërë në Shqipëri, si edhe gjatë bashkëpunimit me autoritetet shqiptare.
Në përfundim të fjalës së tij, Ambasadori Kola i dorëzoi z.
Matteo Rossi Letrat Patente dhe Ekzekuaturën dhe u pre shiriti i zyrës së re të Konsullatës së Nderit, shumë prestigjoze, në selinë e një prej kompanive më të mëdha të Rajonit për transportin detar “Frittelli Maritime”, me adresë në Lungomare Luigi Vanvitelli.
Më pas, të ftuarit u zhvendosën në bordin e një prej anijeve të kompanisë “Frittelli Marittime”, ku familja Rossi kishte organizuar në bashkëpunim me Dioqezën Metropolite të Ankona-Osimo, një mbrëmje bamirësie, një takim të Arqipeshkut me përfaqësues institucioneve, të politikës, të bashkisë, të sipërmarrjeve dhe të shoqatave profesionale dhe sociale. Gjatë këtij takimi, Ambasadori Kola u takua me Kryetarin e Bashkisë së Ankonas Fiorello Gramillano. Në fjalën që mbajtën në këtë takim Arqipeshku Imzot Menichelli dhe Kryetari i Bashkisë Gramillano përshëndetën praninë e Ambasadorit shqiptar dhe theksuan faktin e hapjes së Konsullatës së re të Nderit të Shqipërisë në Ankona.
Diskutime mbi këtë artikull