Kryebashkiaku i Romës, Gianni Alemanno ka deklaruar se së shpejti do ta emërtojë një shesh të Romës me emrin e Nënë Terezës në 100 vjetorin e lindjes së saj. Ai tha se përfaqësues të komuniteti shqiptar i kanë bërë këtë kërkesë dhe tani po shqyrton me hollësi detajet për plotësimin e saj.
“Një shesh kushtuar Nënë Terezës është për Romën një dhuratë që na nxit të jemi të ndjeshëm ndaj problemeve sociale”, tha Alemano.
Lajmi u publikua gjatë ceremonisë solemne që u zhvillua në kryeqytetin italian në nder të nobelistes shqiptare. Në takim ishin të pranishëm përfaqësues të institucioneve italiane dhe shqiptare, autoritete të larta të kishës katolike, kardinalë, drejtues të lartë, kishtar dhe bashkëpunëtorë të Nënë Terezës e cila kishte një lidhje të fortë me Romën. Ajo u shpall qytetare nderi e kryeqytetit italian në vitin 1996.
