Edhe në Modena, në qytetin e lindjes te tenorit të madh L. Pavaroti, u festua 100 vjetori i Pavarësisë Kombëtare të Shqipërisë, përvjetori i krijimit të Shtetit te Parë Shqiptar.Me iniciativën e shoqatës “Agorà dei mondi”, në mbrëmje të 28 Nëntorit, në një nga sallat e Restorant “Venere” u mblodhën mjaft shqiptarë e të huaj, për të festuar këtë ngjarje të rëndësishme të historisë së popullit shqiptar.
Merrnin pjesë intelektualë, imprenditorë shqiptarë e italianë si: Nesim, Kastriot Mauro me familjet e tyre, njerëz të thjeshtë, të rinj e fëmijë. Nderoi me pjesmarrjen e tij edhe Grid Thoma, docent, recercator i konfirmuar në Universitetin Publik të Camerinos.
Në takim u fol për kontributin e madh të Rilindasve shqiptarë, të cilët kudo që ishin punuan e luftuan për të ruajtur e zhvilluar gjuhën, kulturën e traditat shqiptare. Në saje të punës së palodhur të tyre gjuha dhe kultura shqipe, edhe pse pranë dy gjuhëve dhe civilizimeve më të shquara, si atij romak e grek mundi të jetojë e përparojë.
Pastaj u fol për figurën e shquar poliedrike të Ismail Qemalit dhe kronologjinë e ngjarjeve që paraprinë 28 Nëntorin e 1912-ës. Hapi i parë, u tha në takim, u bë më 5 nëntor 1912, në hotelin luksoz “Continental” të Bukureshtit, ku u organizua kuvendi kombëtar me përfaqësues nga gjithë kolonitë shqiptare. Në krye të një delegacioni kishte mbërritur nga Stambolli, Ismail Qemali. U përgatit Hymni i Flamurit me fjalët nga Asdreni si dhe u vendos të shpalosej pas 445 vjetësh Flamuri i Skënderbeut.
Emocionet ishin të papërshkrueshme kur të gjithë më këmbë e dorën në gjoks kënduan Hymnin e Flamurit. Më pas u recituan poezi dhe u kënduan këngë popullore. Vallet e bukura shqiptare u kërcyen edhe nga fëmijët e lindur në Modena. Origjinalitetin dhe bukurinë valleve ia shtuan edhe kostumet popullore që kishin veshur Monda me vajzën e saj, Ludovika.
Festa midis brindesve dhe fotove të shumta vazhdoi deri në orët e vona të mbrëmjes, duke u ndarë me premtimin që fëmijët mos harrojnë të mësojnë gjuhën e të parëve të tyre, gjuhën e ëmbël e të bukur shqipe.
Nga shoqata, “Agorà dei Mondi”
Për të mos humbur artikujt publikuar nga Albania News na ndiqni në Google News
