Të gjithë emigrantët do të aplikojnë për pasaporta biometrike dhe për karta në konsullatat shqiptare ku ata ndodhen. Komisioni parlamentar i Ligjeve miratoi sot projektligjin për pasaportat jashtë vendit.
Dy pika aplikimi për karta e pasaporta do të hapen në Greqi, përkatësisht në Athinë dhe Selanik, ndërsa dy pika të tjera në Itali, përkatësisht në Romë dhe Milano. Në këto dy vende ndodhen shumica prej emigrantëve shqiptarë. Përsa i përket shërbimit të pajisjes me dokumente identiteti në Përfaqësitë Diplomatike Shqiptare parashikohet që të ketë 600 aplikime në ditë. Koncepti i këtij shërbimi është që punonjësit e autorizuar të ambasadës do të jenë ata që do të përdoren për proceset e aplikimit, certifikimit të të dhënave dhe shpërndarjes së dokumenteve. Ndërsa trajnimi, shërbimi dhe supervizimi do të ofrohen nga Aleat sh.p.k.
Edhe ky projektligj ka kaluar vetëm me votat e maxhorancës, ndërsa opozita abstenoi. Deputeti socialist, Fatmir Xhafaj, kërkoi nga maxhoranca që të jepen shpjegime për koston e ngritjes së këtyre katër pikave të aplikimit. Sipas Xhafajt, kostoja e një pasaporte jashtë vendit do të jetë 85 euro.
Diskutime mbi këtë artikull