Para disa ditësh po lexoja me kureshtje një postim nga Rosso Parma ku flitej për kandidimin e mikut tim të vjetër Gentian Alimadhi.
Pas disa muajsh, qytetarët e Parmës që mbështesin Qendrën e Majtë do të thirren për të shprehur preferencën e tyre për përfaqsuesin më të denjë për Kryetarin e Bashkisë së qytetit të tyre. Nuk dua të fokusohem në detajet teknike se kush është Gentiani, ato shumë mire mund t’i lexoni këtu dhe këtu (apo dhe këtu ), por dua t’ju shpreh pse sot, pas shume kohësh, Gentiani më frymëzoi që të dilja nga rutina ime dhe të shihja sërish shpresën se dhe në këtë vend, nuk ka vetëm Lega Nord apo Klloun Cirku që i apelohen barkut dhe jo trurit.
Fitorja e mundshme e Gentianit si kryetar i parë me origjinë të huaj i një qyteti si Parma, përpara se të përfaqsoje konkretizimin e një ëndrre për filo-europianët dhe një kërcënim për simpatizantët e grupeve që citova më sipër, ështe pasqyra e një realiteti, e cila flet qindra gjuhë të ndryshme, edhe pse përdor vetëm një për të komunikuar, lëkura e të cilës merr nuanca nga e bardha tek e zeza, dhe identiteti i të cilës nuk qëndron vetëm në një stereotip, por egzistojnë mijëra, e që të gjitha do të bashkohen në një koncept të vetëm, atë të multikulturalitetit.
Që kur kam nisur publikimin e gazetës online ALBANIA NEWS , Gentiani ka qenë ndër të parët që e ka kuptuar vlerën e një ure komunikimi mes të resë dhe egzistueses, e që për t’u respektuar është nevoja e njohjes. Vetë Gentiani prej vitesh ka marrë këtë barrë përsipër duke krijuar në mënyrë mëse natyrale një bashkësi magjepsëse si Scanderbeg që përveçse na përfaqson më së miri, është shembulli më konkret se si puna e mirë nuk humbet, por futet në çdo shtëpi, përcjell bukuri dhe e bën të panjohurën investim për një qytet që po ndryshon trajta, por asnjëherë nuk çnatyralizohet.
Unë besoj me bindje të thellë që nëse gjithë qytetarët e Parmës arrijnë të shohin vlerën që mund t’i shtojë Gentiani me vizionin e tij, nuk do të jemi përballë një eksperimentimi, por do të gjendemi me Parmën e begatë e cila ka kuptuar se nuk ka rëndësi origjina, gjuha, apo ngjyra e lekurës, por marrin rëndësi faktet dhe veprat të cilat do të ndricojnë çdo shtëpi dhe do të afrojnë akoma më shumë të riun me të vjetrin duke u dehur nga çiltërsia e synimeve të sinqerta për një qytet që hap krahët karshi atyre që e jetojnë dhe atyre që e zgjedhin.
Ndërkohe ka lindur dhe grupi facebook që mbështet kandidaturën e Gentianit.
