Përshëndetje Kampioni ynë Gjetan Keta, mirë se vjen në Albania News. Cilësoj paraprakisht “Kampioni ynë”, pasi fundja ne shqiptarëve na vjen natyrshëm të të konsiderojmë si një Fitues të Shqiptarëve fillimisht e më tej, si Kampion të Botës.
U shpalle muajin që kaloi Kampion i ri i Botës për peshat e mesme si kategori në WBU (World Boxing Union) me garën që fitove në takimin në Dibër të Madhe.
Cilat ishin ndjesitë e tua, para se të ngjiteshe në ring? Kundërshtarin si e konsideroje?
Përshëndetje Adela, Faleminderit Albania News për këtë intervistë!
Emocionet ishin të pafundme!
Të qenit në vendin tim dhe njëkohësisht dhe “Viti i Skënderbeut“ i rrisnin akoma më shumë emocionet dhe përgjegjësitë e mia…
Në kokën time qendronte çdo sekondë një zë që thoshte: “Ti Gjetan duhet patjetër të nderosh Shqiptarët!”
Unë asnjëherë nuk i kam nënvlerësuar kundërshtarët e mi. Asnjëherë nuk kam thënë boll Gjetan, ti je stërvitur mjaftueshëm për këtë kundërshtar!
Madje i kam mbivlerësuar gjithmonë, gjë e cila më bën të stërvitem fort deri në momentin e fundit.
Ç’do të thotë për ty të ndeshesh e jo vetëm, të fitosh në atdheun tënd, në Shqipëri?
Peshë shumë e madhe mbi supe por, njëkohësisht kënaqësi dhe krenari të promovoj vendin tim, Shqipërinë nëpër Botë.
Kujt ia dedikon këtë fitore?
Këtë fitore ia dedikoj Heroit tonë Kombëtar, “Gjergj Kastriot Skënderbeut“, që unë krenohem dhe motivohem me të, të gjithë shqiptarëve që më mbështesin gjithmonë, familjes sime, vëllait e njëkohësisht trajnerit tim, Ismailit, që nuk lodhet kurrë me mua.
Si ishte Gjetani fëmijë apo adoleshent si temperament, përsa i përket raportimit me fizikun e vet e në lidhje me të tjerët, më saktë edhe me boksin, natyrisht atë të improvizuar, pasi ende nuk mund të flitej për përgatitje profesionale…
Kam qenë fëmijë me temperament të fortë dhe shumë nevrik, por asnjëherë problematik. Fëmijë që ëndërronte për të ardhmen. Atëherë thosha: “Ah, sikur të ngjitem një herë në ring!”
Por, kurrë nuk mendoja e besoja që do të arrij këtu ku jam sot!
Cili është mesazhi që një Kampion si ty, i drejton fëmijëve apo të rinjve që kryejnë akte bullizmi?
Mesazhi im për fëmijët, veçanërisht për adoleshentët që janë në një moshë shumë delikate: Të gjejnë doemos kohën, që të praktikojnë ndonjë aktivitet sportiv. Kjo i ndihmon të shkarkojnë energjitë negative, streset dhe lodhjet e ditës. Në këtë mënyrë, nuk bëhet një person tjetër “gur antistresi”!
Dhuna mbi femrat, plagë e rëndë e shoqërisë në nivel botëror por, e theksuar në Shqipëri. Me ç’term do ta përkufizoje një mashkull të dhunshëm ndaj femrës?
Dhunën ndaj një femre, unë e përkufizoj si një akt jo burrëror. Forca fizike e një mashkulli nuk krahasohet me atë të femrës.
Tani po flas edhe profesionalisht: Një femër, sado e përgatitur të jetë fizikisht, Boksiere Profesioniste, nuk futet në ring me një mashkull Boksier! Dhuna nuk sjell zgjidhje!
Trajneri yt është njëkohësisht edhe vëllai yt. Jeni disa persona në familje që merreni me këtë sport. Sipas teje, ky emërues i përbashkët, është një predispozicion i juaji si gen apo thjesht rastësi e, secili nga ju ka ndjekur pasionin e vet me përkushtim?
Po, është e vërtetë. Vëllai im i madh, Ismaili është njëkohësisht trajneri im. Mendoj se është njëkohësisht gjenetik, edhe pasion. Rrënjët gjenetike, trungu e pasion.
Në vendlindjen tënde, Bulqizë, si po shkojnë punët me krijimin e impianteve sportive për rininë, a je i përditësuar, e ndjek, qoftë edhe në distancë situatën atje nën këtë aspekt?
Patjetër që i ndjek. Së fundmi është vendosur krijimi i një kompleksi sportiv, pikërisht në Bulqizë, ku unë bëra ndeshje në tetor të 2014-ës.
Projekte për të ardhmen? Po një ëndërr në sirtar, a e ke?
Projektetet e mia dhe për disa vite të tjera, janë Ndeshjet. Ëndrrën që kisha ëndërruar gjithmonë, “Të bëhem Kampion Bote“, e realizova. Por, dua që këtë ëndërr ta vazhoj më tej me tituj dhe në Federata të tjera Botërore.
Faleminderit , Gjetan Keta!
Për të mos humbur artikujt publikuar nga Albania News na ndiqni në Google News
Diskutime mbi këtë artikull